Agemmay d wayen i s-d-yezzin

Tirgalin

Tirgalin d tigi: b, c, č, d, ḍ, f, g, ǧ, h, ḥ, j, k, l, m, n, ɣ, q, r, s, ṣ, t, ṭ, w, x, y, z, ẓ, ɛ

Llan isekkilen nniḍen ijenṭaden ur nekcim ara deg ugemmay amaziɣ, nesseqdac-iten i wakken ad naru awalen ijenṭaden am p, v.

Amedya:

Pari (Paris), Apuluni (un polonais), Gustave, Valence, ...

Tiɣra

Llant 3 teɣra di tmaziɣt: a, u, i, d teɣri ilem e.
Tiɣri ilem, d tiɣri i yessishilen asenṭeq n wawal, tkeccem-d mi ara d-mlilent ugar n snat n tergalin, ur trekked ara dima deg wemkan-is.

Amedya:

gzem [gzem] abrid / gzem-as [gezm-as] abrid
gezmen [gezmen] abrid

Tiɣri ilem, temxallaf nettat d teɣri a deg usenṭeq.

Amedya:

aman ≠ amen
izan ≠ izen

Tiɣri ilem, nettaru-tt di tazwara n kra n yemyagen yesɛan yiwet n tergelt (taḥerfit neɣ tessed): eg, ečč, efk,... d wid yesɛan snat tegtalin war tiɣri: els, enz, efk,... meɛna ur tt-nettaru ara di taggara n wawalen.

Yiwen imesli, yiwen usekkil

Yiwen imesli nettaru-t s yiwen usekkil. Mačči am kra n tutlayin nniḍen yettarun imesli s sin neɣ ugar isekkilen.

Imesli azenzaɣ d imesli aggaɣ

Alugen :

Ulac amgirred di tira ger imesla izenzaɣen d imesla aggaɣen. Di tmaziɣt llant tmeslayin imalen ɣer tizzenzeɣt (taqbaylit, tacawit, tarifit, ...), llant tid imalen ɣer taggeɣt (tamẓabit, tacelḥit, tatergit, ...).

Amedya :

Di teqbaylit, nettaru tikli ɣas ma nessenṭaq [tiḵli]
Nettaru daɣen ayefki ɣas ma nessenṭaq [ayefki]

- bɣu [ḇɣu], bibb
- ugel [ug̱el], gammi
- ader [aḏer], ndel
- tiṭ [ṯiṭ], ntu

k, b, g, d, t deg wawal amenzu yettwanṭaq d azenzaɣ ma deg wawal wi sin yettwanṭaq d aggaɣ.

Imesli ussid

Alugen :

Imesli ussid nettaru-t s sin isekkilen.

Amedya :

rruḥ n wemdan ≠ ruḥ ɣer tmurt.

Ihi nettaru:
ddu, kker, mmekti, issin, ...

Imesli ufay

Alugen :

Imesli ufay nettaru-t s tneqqiṭ ddaw usekkil.

Amedya :

Nettaru: yehlek iẓi ; mačči yehlek izi ;
akal-nni d aẓrar ; mačči akal-nni d azrar ;
yeffeɣ-as-d ṣṣer deg ifassen-is ; mačči yeffeɣ-as-d sser deg ifassen-is
Ihi nettaru: aḍu, ṣubb, tiṭ, taẓallit, ...

Yella r [ṛ] ufay meɛna ur s-nxeddem ara taneqqiṭ:

rremman [ṛṛemman], arubeyyaw [aṛubeyyaw] (d imɣi), rruḥ [ṛṛuḥ], ijifer [ijifeṛ],
timerqemt [timeṛqemt], r ufay ilmend n q yellan deg wawal,
tiɣerɣert [tiɣeṛɣeṛt], r ufay ilmend n ɣ yellan deg wawal,
arḍel [aṛḍel], r ufay ilmend n ḍ,
arẓeẓ [aṛẓeẓ], r ufay ilmend n ẓ.

Tasureft:

Asekkil ḥ nxeddem-as taneqqiṭ s wadda meɛna mačči d ufay.

Imesli azgenaggaɣ

Amedya :

Ečč, eǧǧ, gezzem, tittin

Alugen :

Imesli [dz] yettas-d dima yessed, u yerna ur yeṭṭuqqet ara aṭas, ɣef waya nettaru-t dima s zz.

Imesli [ts] nettaru-t dima s tt, ḥacama yezga-d di taggara n wawal nettaru-t t, (wali Isem)

Imedyaten:

Imesli anɣi

Alugen :

Di tira, imesli anɣi nettaru-t mebla ^w n wanɣi, d aḥerfi.

Amedya :

Nettaru akbal, axnac, agerbi, aqrab ɣas ma nessenṭaq [akwbal], [axwnac], [agwerbi], [aqwrab], ...

Tamawt :

Llan drus n wawalen yettbeddilen anamek (lmeɛna) ma yettwakkes-asen ^w n wanɣi:
ireggel [ireggwel] ɣer wexxam ≠ ireggel targa (yettarra akal ɣef terga).

Awalen-agi a ten-naru war ^w n wanɣi, anamek ad t-nefhem di twinest.

Deg wawal, ma buhan, sin isekkilen (neɣ tlata ma yessed yiwen) i yettilin ger snat n teɣra.

Amedya :

azelmaḍ, yemmed, yemmden, ...

Tasureft :

weltma (acku d awal yeddsen welt+ma)