Les cours

Agemmay n tmaziɣt yesɛa 32 isekkilen; yewwi-d yakk isekkilen-is si tlatinit ḥaca “ɣ” d “ɛ” i d-yekkan si tegrigit.

Télécharger  
Partager      

Tamsertit tettili mi ara d mlilen sin imesla. Yiwen ger sin-nni ikeccem deg wayeḍ, ttaken-d s umata imesli ussid.

Télécharger  
Partager      

Amyag d aferdis d-yesskanayen tigawt nexdem, taɣara neɣ addad n kra tɣawsa. Amyag yebḍa ɣef sin isufar : amyag amagnu d wemyag n tɣara.

Télécharger  
Partager      

Arbib d awal i d-yeskanayen ayla, taɣara, neɣ kra n ṣṣifa yellan deg yisem. Tigti n yerbiben ttusilɣen seg yemyagen n tɣara, imi d ineggura-agi i d-yeskanayen taɣara n tɣawsa.

Télécharger  
Partager      

Amernu d awal yellan d armeskil. D awal yettbeddilen anamek n wemyag neɣ n yisem.

Télécharger  
Partager      

Anagar sin yismawen imezwura, nesseqdac ismawen n wemḍan i d-yekkan si taɛrabt. Ma yella d ismawen n tmaziɣt, ttwaseqdacen kan di kran n waẓiyen am Itergiyen, Icelḥiyen, Imẓabiyen...

Télécharger  
Partager      

Nesseqdac-iten i wakken a d-nesken neɣ a nwehhi ɣer kra n tɣawsa.

Télécharger  
Partager      

Encore plus...

Ici une liste, non exhaustive, de sites sur différentes thématiques du domaine berbère.


Amyag d aferdis d-yesskanayen tigawt nexdem, taɣara neɣ addad n kra tɣawsa. Ilmend n waya, amyag di tmaziɣt yebḍa ɣef sin isufar :

  • Amyag amagnu, am : kker, ssiwel, ẓer, els, awi, ...
  • Amyag n tɣara, am : imɣur, imlul, ihriw, qqar, ...

Talɣa tamyagant

Talɣa tamyagant (d amyag yeftin di kra n wakud) teddes seg snat tɣawsiwin : afeggag d imattaren udmawanen.
Afeggag s yiman-is yeddes seg snat tɣawsiwin nniḍen : aẓar d teɣra.

talɣa tamyagant = afeggag + imattaren udmawanen
afeggag = aẓar + tiɣra

Amedya :

talɣa tamyagant : turgamt = t + urga + mt

afeggag : urga = u + rg + a
imattaren udmawanen : t, mt
aẓar : rg
tiɣra : u, a

Taseftit n wemyag

I wakken a nesseqdec amyag di twinest, ilaq a t-nessefti di kra n wakud n tseftit.

1/10

Akuden n tseftit

Akuden igejdanen ideg nesseftay amyag d wigi : izri, urmir, urmir ussid, imal d wanaḍ.

a. Izri : nesseftay amayag deg yezri akken a d-nessken kra n tigawt neɣ n waddad iɛeddan (yezrin).
Amedya : yuli, tusa-d, werriɣit, teqqureḍ, ...

b. Urmir : ur yettusseqdac ara aṭas weḥd-s, yettusseqdac di tigti s tzelɣa n yimal a/ad. Ma yella weḥd-s nessqdac-it di kra isuka am wi :
- win yebɣan ad yečč, yečč
- ali s axxam, tessiwleḍ-aɣ-d.
- a k-yeḥrez Rebbi, yeḥrez-ak tarwa-k.
- melmi nekfa azway uzemmur, ini nelqeḍ-it, nejmeɛ-it d igedduden, ini nawi-t ɣer lemɛaṣer neẓẓeḍ-it.
- i tefkem-as cwiṭ lqut !
- qqimet ar azekka, truḥem.

c. Urmir ussid : nesseftay amyag deg wurmir ussid akken a d-nessken s umata :
• tigawt neɣ addad yellan imira :
- atan yettmeslay d gma-s.
- anda-ten iceṭṭiḍen-iw ? La ttkawen.
• tigawt d-yettɛawaden dima :
- iṭij yettali-d seg usamer.
- s tasift i d-itekk yal ass.
• ṣṣifa yellan di kra n tɣawsa :
- anners yettɣar belxef.

d. Imal : nesseqdac-it s umata akken a d-nessken ayen ara yilin ɣer zdat. (imal = ad/a + urmir).
Amedya : tameddit-a ad jbuɣ ɣur-s, ...

e. Anaḍ : nesseqdac s umata anaḍ akken ad nmudd tasunḍa (ordre) neɣ lewṣaya.
Amedya : awi-t yid-k !, xdem tid lɛali a tent-tafeḍ...

2/10

Imattaren udmawanen

Imattaren udmawanen mgarraden ger yemyagen imugna d wid n tɣara.

a. Imyagen imugna :

Imqimen udmawanen Anaḍ Akuden nniḍen
nekk  —(e)ɣ
kečč/kemm  —  t(e)—(e)ḍ
netta i/y(e)— 
nettat t(e)— 
nekni/nekkenti n(e)— 
kunwi  —(e)t t(e)—(e)m
kunemti  —(e)mt t(e)—(e)mt
nutni  —(e)n
nutenti  —(e)nt
Tamawt :
  — afeggag n wemyag

Amattar n wudem wis tlata amalay (i/y(e)) yettwaru i, y, ye ɛla ḥsab ufeggag n wemyag deg wakud ideg nesseftay amyag-agi :
• Ma yella ufeggag ibeddu s yiwet n tergalt, teḍfer-itt-id teɣri, yettwaru i :
inuda, ad inadi, iteddu, ...
• Ma yella ufeggag ibeddu s snat n tergalin, yettwaru ye :
yedda, ad yeddu, yettawi, ...
• Ma yella ufeggag ibeddu s teɣri, yettwaru y :
yuzzel, ad yawi, yurja, ...

3/10

Imattaren udmawanen

b. Imyagen n tɣara :

Anagar deg yezri, imattaren udmawanen i nesseqdac i yemyagen n tɣara am wid n yemyagen imugna. Deg yezri, imayagen n tɣara sɛan imattaren-nsen weḥd-nsen.

Imqimen udmawanen Izri Anaḍ Akuden nniḍen
nekk  —(e)ɣ  —(e)ɣ
kečč/kemm  —(e)ḍ  —  t(e)—(e)ḍ
netta  —  i/y(e)— 
nettat  —(e)t t(e)— 
nekni/nekkenti  —it n(e)— 
kunwi  —it  —(e)t t(e)—(e)m
kunemti  —it  —(e)mt t(e)—(e)mt
nutni  —it  —(e)n
nutenti  —it  —(e)nt
Tamawt :
  — afeggag n wemyag
4/10

Kra imedyaten n tseftit

Aṭas imedyaten n tseftit i yellan (wali KNZ); yal amyag yeṭṭafar amedya ilmend n tuddsa-ines. A-ten-iyi kra seg imedyaten (d tigrummiwin n yemyagen yeṭṭafaren yiwet n tseftit di yakk akuden)
• Imyagen imugna :
- krez, kref, kmes, slef, zlef, kres, ...
- fru, knu, bru, zlu, mḥu, dhu, glu, nwu, ...
- aru, agi, azu, ali, aki, ...
- anez, aker, ader, ...
• Imyagen n tɣara :
- imlul, iwriɣ, ibrik, ifsus, ixfif, imẓi, iɣzif, ...
- aẓay, ajfay, ...

Ha-tt-aya seddaw tseftit n kra imedyaten i d-nefka.

5/10

Kra imedyaten n tseftit

a. Izri

Imqimen udmawanen krez fru aru imlul
nekk kerzeɣ friɣ uriɣ melluleɣ
kečč/kemm tkerzeḍ tefriḍ turiḍ melluleḍ
netta yekrez yefra yura mellul
nettat tekrez tefra tura mellulet
nekni/nekkenti nekrez nefra nura mellulit
kunwi tkerzem tefram turam mellulit
kunemti tkerzemt teframt turamt mellulit
nutni kerzen fran uran mellulit
nutenti kerzent frant urant mellulit

b. Imal (= ad/a + urmir)

Imqimen udmawanen krez (ad+) fru (ad+) aru (ad+) imlul (ad+)
nekk kerzeɣ fruɣ aruɣ imluleɣ
kečč/kemm tkerzeḍ tefruḍ taruḍ timluleḍ
netta yekrez yefru yaru yimlul
nettat tekrez tefru taru timlul
nekni/nekkenti nekrez nefru naru nimlul
kunwi tkerzem tefrum tarum timlulem
kunemti tkerzemt tefrumt tarumt timlulemt
nutni kerzen frun arun imlulen
nutenti kerzent frunt arunt imlulent
6/10

Kra imedyaten n tseftit

c. Urmir ussid

Urmir ussid yettwasuddus s waṭas n tarrayin :
- s tmerniwt n tt neɣ t : awi → ttawi, ddu → iteddu, ...),
- s tussda n yiwet seg tergalin : krez → kerrez, ẓer → ẓerr, ...
- s ubeddel n teɣra : ssken → sskan, ...
- s wesdukel n tlata tarrayin yezrin : mel → mmal, ...

Imqimen udmawanen krez → kerrez fru → ferru aru → ttaru imlul → ttimlul
nekk kerrzeɣ ferruɣ ttaruɣ ttimluleɣ
kečč/kemm tkerrzeḍ tferruḍ tettaruḍ tettimluleḍ
netta ikerrez iferru yettaru yettimlul
nettat tkerrez tferru tettaru tettimlul
nekni/nekkenti nkerrez nferru nettaru nettimlul
kunwi tkerrzem tferrum tettarum tettimlulem
kunemti tkerrzemt tferrumt tettarumt tettimlulemt
nutni kerrzen ferrun ttarun ttimlulen
nutenti kerrzent ferrunt ttarunt ttimlulent

d. Anaḍ

Imqimen udmawanen krez fru aru imlul
nekk
kečč/kemm krez fru aru imlul
netta
nettat
nekni/nekkenti
kunwi kerzet frut arut imlulet
kunemti kerzemt frumt arumt imlulemt
nutni
nutenti
7/10

Akuden iḥerfiyen nniḍen

Anagar akuden igejdanen i d-nuder yakan, llan wakuden nniḍen yellan d isnawiyen (secondaires), am: imal ussid d wanaḍ ussid.

• imal ussid ad/a + urmir ussid :
amedya : a d-yettas akka d asawen, ...
• anaḍ ussid :
amedya : ttawi-t-id ad iwali, mmalet-as ad yissin, ...


Akuden uddisen (wali KNZ)

Akuden i neẓra ar tura d akuden iḥerfiyen, nesseqdac yiwen wemyag i wakken a d-nessken tigawt neɣ addad yellan. Llan di tmaziɣt kra n yemyagen nniḍen i wumi neqqar : imyagen inallalen i nesseqdac ugar zdat n yemyagen i wakken a d-nessken tigawt neɣ taɣara yellan deg wakuden nniḍen (yemgarraden ɣef wakuden iḥerfiyen). Imyagen-agi inallalen d wi: ili, aɣ (lḥal).

Akud uddis yemmal-d tigawt neɣ taɣara yellan weqbel tin yellan deg wakud aḥerfi.

Akken, amedya, a d-nesken belli teḍra tigawt A weqbel tigawt B (ama deg yezri, deg wurmir neɣ deg yimal) nezmer ad nesseqdec akud ussid.

Amedya :

• tigawt A : yekfa ccɣel-is.
• tigawt B : yekcem s axxam.
mi i yekcem s axxam yella (yuɣ lḥal) yekfa ccɣel-is.
mi ara ad yekcem s axxam ad yili (a t-yaɣ lḥal) yekfa ccɣel-is.
mi i ikeccem s axxam yettili yekfa ccɣel-is.

Imedyaten nniḍen :
- mi d-usiɣ yuɣ lḥal yečča
- tella teṭṭes mi d-kecmeɣ
- yettili yeqqar melmi d-tettuɣal s axxam
- ad yili yuli lawan-a

8/10

Tilawt d tibawt

Amyag melmi t-nessefti, ifetti ama s talɣa tilawt ama s talɣa tibawt. Nesseftay-it s talɣa tilawt melmi i yella wayen i d-nettmeslay.
amedya :  yuki, mellul, ad nwali, ...

Nesseftay amyag s talɣa tibawt melmi nebɣa a d-nessken belli tigawt neɣ taɣara iɣef d-nettmeslay ur telli ara.
amedya :  ur yuki ara, ur mellul ara, ur nettwali ara, ...

Akken i nwala deg umedya-yagi aneggaru, i wakken a d-nessken tibawt, nesseqdac tazelɣa ur...ara, tikwal ur weḥd-s akken ad yixfif umeslay.
amedya :  ur ẓriɣ s anda yerra, ur qerriḥ ur merriɣ, ...

Nesseqdac daɣen talɣa-yagi a wer ..., akken a d-nessken asirem ur nebɣi ara a d-yeḍru.
amedya :  a wer yeqqim, a wer trebḥeḍ...


Imedyaten n tesftit di talɣa tibawt (amyag krez)

Imqimen udmawanen izri ibaw
ur ... ara		 urmir ussid ibaw
ur ... ara		 imal ibaw
ur ... ara		 anaḍ ibaw
ur ... ara
nekk krizeɣ kerrzeɣ kerrzeɣ
kečč/kemm tekrizeḍ tkerrzeḍ tkerrzeḍ kerrez
netta yekriz ikerrez ikerrez
nettat tekriz tkerrez tkerrez
nekni/nekkenti nekriz nkerrez nkerrez
kunwi tekrizem tkerrzem tkerrzem kerrzet
kunemti tekrizemt tkerrzemt tkerrzemt kerrzemt
nutni krizen kerrzen kerrzen
nutenti krizent kerrzent kerrzent
9/10

Tilawt d tibawt

S umata, nesseqdac di talɣa tibawt amyag akken yella di talɣa tilawt, nrennu-yas ur...ara. Maca deg yezri llan kra n yemyagen am : krez, ger, ffer, uqem, afeg, azzel, sew, efk, ɣeẓẓ, eg, rnu, usu, li, ɣni, idir, issin, ini, af, aru, ... d wid i ten-yecban (wali KNZ); imyagen-agi tettbeddil cwiṭ talɣa-nsen, s ukeččum n teɣri i.

Amedya :
—eC → ur —iC ara —a → ur —i ara
yekrez → ur yekriz ara
iger → ur igir ara
yeffer → ur yeffir ara
yuqem → ur yuqim ara
yufeg → ur yufig ara
yuzzel → ur yuzzil ara
yedder → ur yeddir ara
yessen → ur yessin ara
 yeswa → ur yeswi ara
yefka → ur yefki ara
iɣeẓẓa → ur iɣeẓẓi ara
iga → ur igi ara
yerna → ur yerni ara
yusa-d → ur d-yusi ara
ila → ur ili ara
yeɣna → ur yeɣni ara
yenna → ur yenni ara
yufa → ur yufi ara

Ma yella ɣef wakuden nniḍen :
• Deg yimal (=ad/a + urmir) ibaw nesseqdac talɣa n wurmir ussid ilaw.
amedya : ad yawi → ur yettawi ara.
• Deg wurmir ussid ibaw, nesseqdac talɣa n wurmir ussid ilaw.
amedya : yettawi → ur yettawi ara.
• Deg wanaḍ ibaw nesseqdac talɣa n wanaḍ ussid ilaw.
amedya : awi → ur ttawi ara.

Tamawt :

Melmi tkeffu telɣa tamyagant s teɣri, ikeččem-d deg umeslay wezgen-aɣri w/y, i wakken a d-yezg ger teɣri-yagi d teɣri a n ara. Dacu kan di tira, ur nettaru ara azgen-aɣri-agi.

Amedya :

Neqqar deg umeslay : [ur yečči wara] neɣ daɣen [ur yečči yara], di tira nettaru-t : ur yečči ara.

Ugar tizelɣiwin ur...ara, nesseqdac daɣen i wakken a d-nessken tibawt, tazelɣa a wer. Nessexdam-itt s umata melmi ur nebɣi ara ad teḍru kra n taluft (d asirem, d amenni neɣ d ddeɛwa).

Amedya :

a wer idiren di tmara, a wer tawḍem, a wer teẓreḍ ass amellal, ...

10/10

Kra n yemyagen ixulfen wiyaḍ

Imayagen-agi ur ggiten ara, ttilin kan di kra n wakuden, mačči akkit.

Amedya :

• imyagen ax, yya ttilin kan deg wanaḍ :
ax, axet/axewt, axemt
yya, yyat/yyaw/yyawt, yyamt

• amyag ugaɣ yella kan deg yezri u yerna deg wudem amezwaru kan i ifetti :
ugaɣ d netta, ugaɣ usan-d

Amaɣun

Amaɣun d yiwet n talɣa n wemyag i nesseqdac melmi yella umeggay d amassaɣ (ama yettwader-d ama xaṭi).

Amedya :

d argaz-nni i d-yusan
tusa-d tmeṭṭut-nni yettun mmi-s

Amaɣun d armeskil, ur yettbeddil ara s ubeddel n tewsit neɣ n wemḍan.
Amaɣun yella deg wakuden-agi: izri, urmir d wurmir ussid.

Asuddes umaɣun

Alugen usuddes Amedya
Talɣa tilawt i/y(e) + afeggag + (e)n
deg yezri / urmir / urmir ussid		 d aqcic i yuraren / ara yuraren / i yetturaren ddabex
d netta i yulin / ara yalin / i yettalin
Talɣa tibawt ur n(e) + afeggag [ara]
deg yezri ibaw / urmir ussid ibaw		 argaz ur nesɛi / ur nseɛɛu ara adrim meḥqur
win ur nuli / ur nettali ɣef yigmir a t-yawi wasif

Tazelɣa n tnila

Nesseqdac di tmaziɣt tazelɣa n tnila d/n i wakken a d-nessken neɣ a d-nmel s anda neɣ ansa i d-tekka tigawt.

• Tazelɣa d tettweǧǧih tigawt ɣer win i d-yettmeslayen.
Amedya : iruḥ-d iḍelli (iruḥ ɣer win i d-yettmeslayen)

• Ma yella tazelɣa n tesskanay-d belli tigawt terra ɣer win i d-isellen, neɣ terra ɣer wemkan nniḍen.
Amedya : iruḥ-n (iruḥ ɣer lǧiha n win i d-isellen neɣ s amkan nniḍen)

• Llan kra n yemyagen ukud nesseqdac dima tazelɣa n tnila.
Amedya : as-d, mmekti-d (ur d-neqqar ara : as, mmekti, ...)

Amyeḍfer n yewṣilen n wemyag

Iwṣilen n wemyag akken nwala d wi :
• imqimen usriden
• imqimen irusriden
• tazelɣa n tnila

Iwṣilen-agi zeggen-d dima deffir n wemyag, ḥaca di talɣa tibawt neɣ deg yimal anda i zeggiren amyag.

Amedya :

yessawel-as, a s-yessiwel, ur s-yessawel ara
tečča-tt, a tt-tečč, ur tt-tečči ara
kecmen-d, a d-kecmen, ur d-kcimen ara

Melmi mlalen yakk yewṣilen-agi ɣef tikkelt, nzeggir dima seg wemqim arusrid, mbeɛd ɣer wemqim usrid, ma yella d tazelɣa n tnila, tzegg-d dima di taggara.

Melmi i tezga tzelɣa n tnila deffir n wemqim usrid, nesseqdac talɣa id/in.
Amedya :  yuzen-as-d, yuzen-as-t-d

Imedyaten nniḍen :

wwin-am-tt-id, a m-tt-id-awin, ur m-tt-id-wwin ara, ...

Tamawt :

• Nesseqdac tazelɣa n yimal a melmi zeggiren yewṣilen amyag : ad yawi → a s-t-id-yawi, ...
• Tazelɣa n tnila n ur tt-nesseqdac ara s waṭas.

Imyagen izellumen

1/5


Imyagen izellumen ttwasilɣen seg yemyagen iḥerfiyen ama d imugna neɣ n tɣara.

Tlata leṣnaf neɣ n talɣiwin i nezmer ad nsuddes seg yemyagen iḥerfiyen :
- amyag aswaɣ
- amyag attwaɣ
- amyag amyaɣ

Imyagen izellumen ṭṭafaren ilugan n tseftit n yemyagen iḥerfiyen.

2/5

Amyag aswaɣ

Amyag aswaɣ yettwasileɣ s wezwar n s neɣ yiwet seg talɣiwin-is: sse, ssu.

Ilugan d imedyaten :
C1C2— → sseC1C2— kcem → ssekcem  
C(C)V— → sC(C)V— becc → sbecc
ni → sni
luɣ → sluɣ
laqeb → slaqeb
ɣer → sɣer
llebleb → slebleb 		mmekti → smekti
nnum → snum
ddukel → sdukel
ddari → sdari
nnulfu → snulfu
CCC1V— → sseCC1V— nnser → ssenser  
eCC/eC1C2 → sseCC/sseC1C2 eww → sseww ers → ssers
aC— → ssiC— afeg → ssifeg
azzel → ssizzel 		aɣ → ssiɣ
agad → ssiged
uC(C)uC → ssuC(C)eC urug → ssureg
uzuf → ssuzef 		ucuf → ssucef [ccucef]
u—u → ssu—u unẓu → ssunẓu  
iC1(C2)iC3 → ssiC1(C2)eC3 ilqiq → ssilqeq
irid → ssired
izdiw → ssizdew 		ifif → ssifef
ifrir → ssifrer
i—uC → ssi—eC imsus → ssimses
ifsus → ssifses 		imlul → ssimlel
3/5

Amyag amyaɣ

Amyag amyaɣ yettwasileɣ s wezwar n tergalt m neɣ yiwet seg talɣiwin-is: my(e), myu

Amyaɣ d amyag d-yeskanayen amyebdal n tigawt.
Amedya : myuzzamen = mbadalen tuzzma (wa yezzem wayeḍ)

Ilugan d imedyaten :
C1C2V— → myeC1C2V—
(C1C2eC → myeC1C2aC) 		ḥder → myeḥdar
jgugel → myejgugel
zwir → myezwir 		lhi → myelhi
lḥu → myelḥu
CCV— → mC1VC2—
(CaCeC : tikwal e tettuɣal d a) 		beddel → mbeddal
beccer → mbeccer
ruḥ → mruḥ
ɣull → mɣull
wanes → mwanes
laqeb → mlaqeb
qass → mqass
qil → mqil 		qirr → mqirr
siwel → msiwel
cedhi → mcedhi
ɣunfu → mɣunfu
ḥerr → mḥerr
ẓer → mẓer
cihwi → mcihwi
laɛi → mlaɛi
CCV— → mCV—
(CCeC → myeCCeC/myuCCeC, tikwal e tettuɣal d a) 		qqen → myeqqen
nneḍ → myennaḍ
ṭṭef → myuṭṭaf
ttel → myuttel
ssensel → msensal
xxerweɛ → mxerweɛ
ffezwi → mfezwi 		ssuden → msuden
llukkez → mlukkaz
hherwaw → mherwaw
ggugi → mgugi
nnal → mnal
ssirem → msirem
VC— → myVC— if → myif
asem → myasam
amen → myamen
ali → myali
aɣ → myaɣ 		agad → myagad
efk → myefk
err → myerr
ečč → myečč, myučč
aru → myaru
4/5

Amyag attwaɣ

Attwaɣ d amyag yettwassilɣen s wezwar n : ttu, ttwa, tt, mm(e), n, nn(e) i wemyag aḥerfi. D talɣiwin ttu d ttwa i yettusseqdacen i tigti n yemyagen.

Attwaɣ yeskanay d akken tigawt tettrusu-d ɣef umeggay.

Ayen yeɛnan ilugan, ulac akka ilugan ibanen ɛlaḥsab n talɣa n wemyag aḥerfi. Ad tafem deg tfelwit yellan seddaw imedyaten igejdanen d wettwaɣ-nsen.

Imedyaten n talɣiwin :
krez → ttwakrez
mlek → ttwimlek, ttumlek
nteg → mmenteg
qbel → nneqbal
ɛdem → nneɛdam
wet → ttwet
ɣez → ttwaɣez
llem → ttwallem
nneḍ → ttwinneḍ
tter → mmter
becc → ttubecc
ceqq → nceqq
ddhem → ttwadhem, ttudhem
lekken → ttwalekken
lebbes → ttulebbes
ɣellet → ttwiɣellet
rki → ttwirki
ẓmi → nneẓmi
zzi → ttwazzi
ttu → mmett
ɣull → ttwaɣull
cudd → ttucudd
afes → ttwafes
aweḍ → ttwiweḍ
aɣ → ttwaɣ
latem → ttulatem
ḥwiǧ → ttwiḥwiǧ
ciwer → ttuciwer
menni → ttumenni
ɣeẓẓ → ttwaɣeẓẓ
ẓer → mmẓer
ẓem → nnẓem
els → mmels
ečč → mmečč
nfu → ttwanfu
zlu → mmzel
irid → nired
dawi → ttudawi
5/5

Izelman izelman

Yezmer lḥal ad nessqdec tizelɣiwin n izelman, i d-nuder yakan, ɣef yemyagen izelman i wakken ad nessileɣ imyagen nniḍen.

imedyaten
enz → zzenz → ttuzenz
ḥfeḍ → sseḥfeḍ → mseḥfeḍ
dderɣel → sderɣel → myesderɣel
bibb → mbibb → ssembibb
ames → ssimes → msimes
aǧew → ssiǧǧew → msiǧǧew
efk → nnefk → ttunefk

Ayen i ilaqen a t-nissin ɣef wemyag

  • Talɣa tamezwarut (teḥerfit) n wemyag di tmaziɣt tettili am akken ad nessuter abɛeḍ ad yexdem kra n taɣawsa neɣ ad yaɣ kra n ṣṣifa neɣ ad kra n waddad :
    amedya : ečč, xdem, zlu, gzem, iwriɣ, qqar, bzeg, kkernenni, lluɣẓem, ...
  • Talɣa n yimal tettili s tmerniwt n tzelɣa ad i talɣa n wurmir aḥerfi.
    amedya : ad y+ečč, ad čč+eɣ, ad t+ečč, ...
  • Akken ad nissin amek ara nessefti amyag deg wurmir ussid ad nerr amyag yellan di talɣa taḥerfit ɣer talɣa n tannumi, am wakken ara tettwixdem tigawt-nni yal ass.
  • Urmir ussid yettwasuddus s waṭas n tarrayin :
    - s tmerniwt n tt neɣ t (awi → ttawi, ddu → teddu, ali → ttali, iwriɣ → ttiwriɣ, ...)
    - s tussda n yiwet seg tergalin (krez → kerrez, ẓer → ẓerr, tnu → tennu, fru → ferru, ...)
    - s ubeddel n teɣra (ssken → sskan, ...)
    - s wesdukel n tlata tarrayin yezrin (mel → mmal, ...)

Iluɣma I

Le contenu auquel vous souhaitez accéder est réservé aux membres inscrits.
Connectez-vous, ou créer un compte gratuitement, pour accéder :
• aux exercices (illustration, pdf, audio, ...) et quiz de chaque cours
• aux formulaires d'évalution
• au suivi de l'état d'avancement et l'évolution de votre travail
Connexion
Inscription

Iluɣma II

Le contenu auquel vous souhaitez accéder est réservé aux membres inscrits.
Connectez-vous, ou créer un compte gratuitement, pour accéder :
• aux exercices (illustration, pdf, audio, ...) et quiz de chaque cours
• aux formulaires d'évalution
• au suivi de l'état d'avancement et l'évolution de votre travail
Connexion
Inscription

Quiz

Le contenu auquel vous souhaitez accéder est réservé aux membres inscrits.
Connectez-vous, ou créer un compte gratuitement, pour accéder :
• aux exercices (illustration, pdf, audio, ...) et quiz de chaque cours
• aux formulaires d'évalution
• au suivi de l'état d'avancement et l'évolution de votre travail
Connexion
Inscription