Isem

Les cours

01. Agemmay d wayen i s-d-yezzin

Agemmay n tmaziɣt yesɛa 32 isekkilen; yewwi-d yakk isekkilen-is si tlatinit ḥaca “ɣ” d “ɛ” i d-yekkan si tegrigit.

Quiz

Télécharger

02. Tamsertit

Tamsertit tettili mi ara d mlilen sin imesla. Yiwen ger sin-nni ikeccem deg wayeḍ, ttaken-d s umata imesli ussid.

Quiz

Télécharger

03. Isem

Isem amaziɣ yesɛa: asmil, tawsit, amḍan akk d waddad.

Quiz

Télécharger

04. Amyag

Amyag d aferdis d-yesskanayen tigawt nexdem, taɣara neɣ addad n kra tɣawsa. Amyag yebḍa ɣef sin isufar : amyag amagnu d wemyag n tɣara.

Quiz

Télécharger

05. Imqimen udmawanen

Imqimen udmawanen bḍan ɣef sin yeḥricen : imqimen udmawanen ilelliyen d yemqimen udmawanen iwṣilen.

Quiz

Télécharger

06. Arbib

Arbib d awal i d-yeskanayen ayla, taɣara, neɣ kra n ṣṣifa yellan deg yisem. Tigti n yerbiben ttusilɣen seg yemyagen n tɣara, imi d ineggura-agi i d-yeskanayen taɣara n tɣawsa.

Quiz

Télécharger

07. Amernu

Amernu d awal yellan d armeskil. D awal yettbeddilen anamek n wemyag neɣ n yisem.

Télécharger

08. Amḍan

Anagar sin yismawen imezwura, nesseqdac ismawen n wemḍan i d-yekkan si taɛrabt. Ma yella d ismawen n tmaziɣt, ttwaseqdacen kan di kran n waẓiyen am Itergiyen, Icelḥiyen, Imẓabiyen...

Iluɣma

Télécharger

09. Imeskanen

Nesseqdac-iten i wakken a d-nesken neɣ a nwehhi ɣer kra n tɣawsa.

Télécharger

10. Présentatifs, irbuda, imattaren...

Présentatifs, irbuda, imattaren...

Télécharger

Encore plus...

Ici une liste, non exhaustive, de sites sur différentes thématiques du domaine berbère.

Tazwart

Tamsirt-agi n yisem tebḍa ɣef kuẓ (rebɛa) yeḥricen igejdanen :

1. Asmil neɣ ṣṣenf n yisem

Isem n timmarewt : yelli, dadda, yemma, aḍeggal, ...
Isem amagnu : aqcic, itri, tala, tafat, ...

2. Tawsit

Isem amalay : allaɣ, argaz, inisi, imensi, annar, aqcic, ...
Isem unti : tameṭṭut, tala, taqcict, talwizt, ...

3. Amḍan

Isem asuf : azger, asif, igenni, ...
Isem asget : izgaren, isaffen, igenwan, ...

4. Addad

Isem ilelli : d aqcic i d-yusan
Isem amaruz : yeṭṭes weqcic

Asmil n yisem (timmarewt/amagnu)

1. Isem n timmarewt

D isem icudden ɣer twacult.

Amedya :

mmi, yelli, xali, dadda, yemma, yaya, aslif, tanuṭ, aḍeggal, ...

2. Isem amagnu

D isem ur nelli n timmarewt.

Amedya :

akal, tammusni, tisegnit, aɣenǧa, tiṭ, amdan, tayri, ameksa, tamegra, ...

Tawsit (amalay/unti)

Isem yesɛa snat n tewsatin: d amalay neɣ d unti.

1/4

Isem amalay

Isem amalay di tigti ibeddu s teɣri ama s a, i neɣ u.

Amedya :

aman, amalus, awal, asamer, ini, igenni, imru, ileẓwi, uraw, ugur, uẓu, ...

Tasureft :

Llan kra n yismawen nniḍen, ur ggiten ara aṭas, ur beddun ara s teɣri maca s tergelt.

Amedya :

seksu, laẓ, fad, lellu, beqqu, faccal, mmi, ...

2/4

Isem unti

Isem unti itekk-d s umata seg yisem amalay, yettili-d s tmerniwt n t di tazwara d tayeḍ di taggara.

Amedya :

tameṭṭut, tala, tamesrifegt, taqcict, talwest, talwizt, tigawt, ...

Alugen amatu :

isem unti = t + isem amalay + t

Amedya :

aqcic → taqcict
amcic → tamcict
alɣem → talɣemt

ilemẓi → tilemẓit
amɣar → tamɣart
isli → tislit

Tasureft :

Llan kra n yismawen untiyen ur neṭṭafar ara alugen-agi.

izem → tasedda
argaz → tameṭṭut

akrar → tixsi
iḥiqel → tasekkurt

Llan kra n yismawen untiyen i ibeddun s t maca ur keffun ara s t.

Amedya :

tilelli, taguni, temẓi, taɣuri, tamara, tawla, tiḥerci, taggara, ...

3/4

Tamiwin ɣef yisem unti

1. Isem unti yezmer lḥal a d-yesken anamek nniḍen ur nelli d unti :

a. asimecteḥ neɣ asimẓi (diminutif)
axxam → taxxamt
akeccaḍ → takeccaṭ

b. tamɛayrit neɣ alaqeb (péjoratif)
argaz → targazt

c. aferdis (unité)
aweṭṭuf → taweṭṭuft
azemmur → tazemmurt

2. Melmi yekfa yisem amalay s t, isem unti nettaru-t kan s yiwen n t ɣer deffir, fiḥel ma nerna-yas wis sin.
aseksut → taseksutt → taseksut

3. Akken daɣen ismawen ikeffun s tt [ts] nettaru-ten yakk s yiwen n t kan.
tidet, tunet, tuget, takwat, tabrat, ...

4. Melmi yekfa yisem amalay s ḍ, unti-ines ikeffu s ṭ (ḍt → ṭ).
abelluḍ → tabelluḍt → tabelluṭ
ablaḍ → tablaḍt → tablaṭ
acelgiḍ → tacelgiḍt → tacelgiṭ

5. Melmi yekfa yisem amalay s d, unti-ines ikeffu s t (dt → t).
agellid → tagellidt → tagellit

6. Llan kra n yismawen untiyen i wumi nrennu yiwen seg wezgen-iɣriyen (y neɣ w) ngum neɣ weqbel t n taggara.
ameksa → tameksawt
aɣerda → taɣerdayt

4/4

Tamiwin ɣef yisem amalay d yisem unti

1. Ismawen ureṭṭal bḍan ɣef sin yeḥricen: llan wid yeqqimen akken di talɣa-nsen (akken llan di tutlayt ansa i d-ttwaddmen)
lxedma, nneyya, ṣṣeḥ, rradyu, ṭabla, lehna, lkas, lḥenna, zzman,
leɛlam, leqlam, lqahwa, lbaraka, lqut, ...

Llan dɣa wid yettwamuzzɣen (tebdel talɣa-nsen, ṭṭfen talɣa n yisem amaziɣ). Ismawen-agi ṭṭafaren ilugan nesseqdac i yisem amaziɣ.
akursi, ajadarmi, abugaṭu, tamacint, tabenket, taferciṭ, aḥutiw, ...

2. Llan kra n yismawen imalayen yettwassilɣen seg wunti, maca sskanayen-d anamek ulaqeb neɣ usimɣer, mačči win umalay.
- alaqeb : tameṭṭut → ameṭṭu ...
- asimɣer : tiṭ → iṭṭew ...

3. Ismawen ureṭṭal (ur nettwamuzzeɣ ara), ikeffun s teɣri, s umata d imalayen.
lkas, leɛlam, ṣṣeḥ, lḥeqq, leqlam, ...

3. Ismawen ureṭtal (ur nettwamuzzeɣ ara), ikeffun s teɣri, d untiyen s umata.
lxedma, nneyya, ṭabla, rradyu, leḥna, leḥnana, lqahwa, ...

Amḍan (asuf/asget)

1/5

Isem amaziɣ yettili ɣef snat n talɣiwin n wemḍan: d asuf neɣ d asget.
Anagar yiwen yisem : berdayen, ulac di tmaziɣt isem di talɣa n sin, ḥaca kra n yismawen ureṭṭal (si taɛrabt) i d-yettwareḍlen akken di talɣa-yagi n sin.

Amedya :

mertayen (snat tikkal), ɛamayen (sin iseggasen), yumayen (sin wussan), ...

Asuf

Isem asuf yesskanay-d isem di talɣa n yiwen (yiwet n tɣawsa).

Amedya :

argaz (yiwen wergaz), tameṭṭut (yiwet n tmeṭṭut), ...

Asget

Isem asget yesskanay-d isem di talɣa n waṭas (sin neɣ ugar n tɣawsiwin).

Amedya :

irgazen (sin neɣ ugar n yergazen), tilawin (snat neɣ ugar n tlawin), ...

- Kra n yismawen ttilin ḥaca deg wesget (ur sɛin ara asuf).
aman, ilefḍan, tiqqar, ammiwen neɣ tammiwin, medden, tisusaf, ...

- Llan kra n yismawen ur nesɛi ara asget (ttilin kan deg wasuf).
tidet, tiɣrit, tagella, ...

- Llan daɣen kra isegten ur nesɛi anamek n wesget.
tuccanin (d imɣi), timeddukal (d imɣi), ...

- Llan yismawen daɣen yesɛan sin isegten.
acelgiḍ → icelgiḍen / iclegyaḍ, ...

2/5

Talɣiwin n wesget:
asget s tmerniwt neɣ asget amagnu (pluriel externe/régulier).

S umata d asget i d-yettilin s ubeddel n teɣri a s teɣri i, d tmerniwt n yiwen seg imattaren-agi n wesget di taggara : en, awen, an, ... D asget iwumi qqaren régulier acku ulac abeddel deg ugensu n yisem.

Ilugan d imedyaten :

asekkil c yettgensis targelt.

Asuf	Asget (amaly / unti)
`(t)a/i—c(t)`	`i—cen/can/cawen`	`ti—cin/catin/cawin`
amɣar, tamɣart izir isem azrem, tazremt ilef, tileft	imɣaren iziren ismawen izerman ilfan	timɣarin tizermatin tilfatin
`(t)a/i—i(t)`	`i—iyen/iten`	`ti—iyin/itin`
ajenwi, tajenwit aẓawali, taẓawali ibidi	ijenwiyen iẓawaliyen ibiditen	tijenwiyin tiẓawaliyin
`(t)a/i—u(t)`	`i—uyen/uten`	`ti—uyin/utin`
abugaṭu, tabugaṭut agudu	iguduyen	tibugaṭutin
`(t)a/i—a(w)(t)`	`i—ayen/aten/awen`	`ti—iyin/atin/awin`
ameksa, taɣenjawt abucriḍa abeqqa	imeksawen ibucriḍaten ibeqqayen	tiɣenjawin

3/5

Talɣiwin n wesget:
asget s ubeddel (pluriel par alternance/interne).

Yettili s ubeddel n teɣra yellan deg ugensu n wawal. Di talɣiwin n yisem i d-nmudd seddaw, tiɣra i d-nessken d tid yellan n ugensu, amedya: amalu yettwagenses s talɣa a—u, acku d tiɣra-yagi i yeɛna ubeddel, ma yella d tiɣri tamenzut (neɣ amagrad), nenna-d yakan belli yettuɣal s umata d i.
Asekkil ¯ yesskanay-d belli ulac tiɣri tagejdant (a, u, i), amedya: ¯—u(c), talɣa-yagi tettgensis ismawen yesɛan yiwet n teɣri tagejdant (u) deg ugens n wawal am: awtul,...

Ilugan d imedyaten :

asekkil v yettgensis tiɣri.

`a—v—v—` → `i—u—a—`
amrar → imurar amadaɣ → imudaɣ abalma → ibulma amayeg → imuyag ayaziḍ → iyuzaḍ abagus → ibugas abuḍec → ibuḍac aẓiḍuḍ → iẓuḍaḍ amuḍin → imuḍan
`a/i—i—(Ø,u)—` → `i—i—a—`
acifuḍ → icifaḍ
`a—(Ø,u)—(v,i)—` → `i—Ø—a—`
awtul → iwtal amenzu → imenza amcic → imcac abelqeṭṭiḍ → ibelqeṭṭaḍ agelzim → igelzyam asegres → isegras

- Ismawen untiyen, umu yettfakka wesget s a.

Amedya :

talast → tilisa
tamurt → timura

tamart → timira
tawwurt → tiwwura

4/5

Talɣiwin n wesget:
asget s tmerniwt d ubeddel (pluriel mixte).

Asget-agi yettwasileɣ s useqdec n snat tarrayin i neẓra yakan: timerniwt imattaren n wesget d ubeddel n teɣra tigejdanin n yisem. Ma yella d tiɣri tamenzut (amagrad) tettuɣal s umata d i.

Amedya :

izimer → izamaren (timerniwt n umattar n wesget: en, d ubeddel : i—¯ → a—a)

Imedyaten nniḍen :

tasedda → tisedwin
aẓekka → iẓekwan
igenni → igenwan
tamda → timedwin
aḍar → iḍarren
akufi → ikufan
itri → itran
imi → imawen
izi → izan

abrid → iberdan
aceqquf → iceqfan
aɛekkaz → iɛekzen
azger → izgaren
aẓar → iẓuran
ibiw → ibawen

afus → ifassen
asif → isaffen
iɣil → iɣallen

tameɣra → timeɣriwin
targa → tiregwa
tala → tiliwa

5/5

Kra isegten nniḍen

- Amagrad a ur yettbeddil ara.

tama → tamiwin
arkas → arkasen

azal → azalen

akrar → akraren

- Amagrad i yettuɣal d a

icc → acciwen

inzer → anzaren

iccer → accaren

- Melmi yella umagrad d u, ur yettbeddil ara.

ul → ulawen
tuɣmest → tuɣmas

ugel → uglan
tunet → tuna

ugur → uguren

- Amagrad a yettuɣal d u.

ass → ussan
taddart → tuddar

tallest → tullas

tayet → tuyat

- Amagrad i yettuɣal d u.

iḍ → uḍan

- Asuf d wesget ur d-kkin ara seg yiwen uẓar.

tameṭṭut → tilawin
tafunast → tisita

aqcic → arrac
tiṭ → allen

bab → imawlan
mmi → arraw

- Ismawen ureṭṭal: wid yettwamuzzɣen, ttabaɛen alugen n yisem amaziɣ.

ajadarmi → ijadarmiyen

taktubt → tiktubin

- Ismawen ureṭṭal: wid ur nettwamuzzeɣ ara, tikwal ttawin-d asget akken yella (ismawen n taɛrabt), neɣ nrennu-yasen awṣil (w)at neɣ seɛɛun tikwal asget s ubeddel n teɣra neɣ s ubeddel d tmerniwt. (ṣṣenf wis 2 d wis 3)

ccɣel → lecɣal
ṭṭabla → ṭṭablat / ṭṭwabel

leqlam → leqlamat
lkas → lkisan

rradyu → rradyuwat
lḥeqq → leḥquq

Addad (ilelli/amaruz)

1/9

D acu i d addad ilelli d waddad amaruz

Addad ilelli, d addad ideg yettili yisem di talɣa-s tamagnut i nessen. Ma yella d addad amaruz, yettbeddil deg-s yisem talɣa-ines (d amagrad i yettbeddilen talɣa). Abeddel-agi n talɣa yesskanay-d d akken isem-agi yeqqen neɣ yurez ɣer kra n uferdis nniḍen di twinest, ɣef waya i s-neqqar: isem deg waddad amaruz. Ihi, addad amaruz yeɛna kan ismawen ibeddun s umagrad.

Asmekti :

amagrad ((t)a/(t)i/(t)u) s yis-s i ibeddu yisem amaziɣ s umata, ama d asuf neɣ d asget, d amalay neɣ d unti.

Amedya :

yettwačč seksu-nni
yettwačč wudi
tɣucc tmeṭṭut-is
ɛeddan wussan
cebbḥent teslatin

deg waddad ilelli seksu, d isem war amagrad
deg waddad ilelli udi, d isem amalay asuf ibeddun s umagrad u
deg waddad ilelli tameṭṭut, d isem unti asuf ibeddun s umagrad ta
deg waddad ilelli ussan, d isem amalay asget ibeddun s umagrad u
deg waddad ilelli tislatin, d isem unti asget ibeddun s umagrad ti

2/9

Amek ad naru addad amaruz

S umata, addad amaruz d abeddel di talɣa umagrad, abeddel-agi yettili-d ama :

- s tmerniwt n w/y (i yisem amalay)

i wass-nni anda i telliḍ (ass)

deg yiḍ i d-yusa (iḍ)

yeqqim sin wussan (ussan)

- s ubeddel n teɣri umagrad (a → u)
yekka-d s ufella (afella)

- s tmerniwt n w/y (i yisem amalay), d uɣelluy n teɣri umagrad (a → we / i → ye / ta → t(e) / ti → t(e))

yusa-d wergaz (argaz)
ɛeddan yergazen (irgazen)

yeffer-itt di texxamt (taxxamt)
yeffer am tmeṭṭut (tameṭṭut)

usant-d teslatin (tislatin)
ffɣent-d tlawin (tilawin)

Tamawt :

Ugar n yismawen ur nbeddu ara s umagrad am:
- ismawen imaziɣen: seksu, laẓ, beṭṭu, yemma, mmi, yelli, ...
- ismawen ureṭṭal: ṭabla, lxedma, ...
- ismawen imukan (toponymes), n medden (noms propres), ... : Muḥend, Jeǧǧiga, Wehran, Fransa, ...
Llan yismawen yesɛan amagrad d acu kan talɣa-nsen deg waddad amaruz ur tettbeddil ara (am tin n waddad ilelli): tala, ugu, tigawt, ...

3/9

Melmi i yettuɣal yisem deg waddad amaruz

1. Isem deffir n tenzeɣt

imeggel s yezgaren (izgaren)
yuder ɣer waddaynin (addaynin)

tugem-d seg wemdun (amdun)
yuli nnig wexxam (axxam)

Tasureft :

Melmi d-yezga yisem deffir n tenzeɣt s (vers), neɣ tanzeɣt ar, yettɣima di talɣa-ines tilellit.

iruḥ s axxam

ad qqimeɣ ar tameddit

2. Isem d ameggay deffir wemyag

yečča wergaz (argaz)
yuɣal-d umeksa (ameksa)

taɣaṭ-nni yečča-tt wuccen (uccen)
kfan tayerza yergazen (irgazen)

Isem di twinas-agi d ameggay (d netta i igan tigawt), yezga-d deffir n wemyag, ɣef waya i yuɣal d amaruz.

Ma yella yezga-d umeggay qbel n wemyag, yettɣima kan akken deg waddad ilelli.

argaz i yeččan

4/9

Melmi i yettuɣal yisem deg waddad amaruz

3. Isem yettwalsen (yettwabedren yakan s wemqim awṣil)

Melmi i d-yettwabder yakan yisem di twinest, ama s wemqim usrid neɣ arusrid, allus-ines yettili deg waddad amaruz.

zzenzen-t wexxam-nni (amdun)

- t d amqim awṣil i d-yesskanayen axxam.
- wexxam d isem yettwalsen, nɛawed-as abdar imi yettwabder-d yakan s wewqim t

4. Isem d asemmad asekkan

a. D asemmad n yisem :
axxam n yesli, tuččit n umuḍin, lǧerra n inisi, ...

b. D asemmad n wemqim :
wid n ufella, tin n wedrar, ...

c. D asemmad n umernu :
aṭas n tmura, drus n yedrimen, ...

d. D asemmad n werbib :
aberkan uqerruy, ...

e. D asemmad n werbadu :
kra n yergazen, ...

f. D asemmad n wemḍan :
snat n teqcicin, ...

g. Isuka nniḍen :
d argaz yelhan wergaz n Faḍma (allus n yisem), annect-is weqcic-agi, ines wedfel-agi

5/9

Talɣiwin n yisem amaruz

Isem melmi yella deg waddad amaruz yettbeddil talɣa-ines ; d amagrad i si ibeddu i yettbeddilen talɣa-s, ɛla ḥsab n talɣa n yisem, ama s uɣelluy, s ubeddel neɣ d usekcem d yiwen seg yezgen-iɣriyen w/y.
Seddaw-agi a nwali ilugan i yeṭṭafar yisem melmi i yuɣal seg waddad ilelli ɣer waddad amaruz.

Tamawt :

C targalt ; V tiɣri

6/9

Talɣiwin n yisem amaruz
1. Abeddel neɣ aɣelluy n tiɣri umagrad

Alugen 1 :

Talɣa n yisem deg waddad ilelli	Talɣa n yisem deg waddad amaruz
`a`C₁C₂V—	`we`C₁C₂V—
`i`C₁C₂V—	`ye`C₁C₂V—
`ta/ti`C₁C₂V—	`te`C₁C₂V—

Amedya :

azrem → wezrem
azrar → wezrar
aksum → weksum

aɣmis → weɣmis
itri → yetri
tasraft → tesraft

tawrirt → tewrirt
tawtult → tewtult
tislit → teslit

tifyar → tefyar
tiflut → teflut
tifdent → tefdent

Tisuraf :

- a— → wa— :

arkas → warkas
aɛrab → waɛrab

arẓaẓ → warẓaẓ
anẓad → wanẓad

ayrad → wayrad
arseḍ → warseḍ

akbal → wakbal
aldun → waldun

- ta— → ta— :

tarkast → tarkast

tafrara → tafrara

- ti— → ti— :

tixsi → tixsi

tifrat → tifrat

tismin → tismin

tikli → tikli

Alugen 2 :

Talɣa n yisem deg waddad ilelli	Talɣa n yisem deg waddad amaruz
`a`C₁VC₂—	`u`C₁C₂V—
`ta/ti`C₁VC₂—	`t`C₁C₂V—

Amedya :

agujil → ugujil

ayefki → uyefki

tafunast → tfunast

timura → tmura

7/9

Talɣiwin n yisem amaruz
2. Tiɣri umagrad `a` ur tettbeddil ara

Alugen 1 :

Talɣa n yisem deg waddad ilelli	Talɣa n yisem deg waddad amaruz
`a`—	`wa`—
`ta`—	`ta`—

Alugen-agi ṭṭafaren-t yismawen yesɛan talɣa-yagi ((t)a d amagrad):
(t)aC₁VC₂(t) ; (t)aC₁C₁(C₂)V— ; (t)aC₁C₂V(t)

Amedya :

aman → waman
awal → wawal
arrac → warrac
allen → wallen

aḍu → waḍu
ass → wass
akli → wakli
aggur → waggur

aggam → waggam
tala → tala
tafat → tafat
taklit → taklit

tassemt → tassemt
taggara → taggara
tazzla → tazzla

Tisuraf :

- a— → u— :

afus → ufus
afud → ufud
aḍar → uḍar

aẓar → uẓar
amud → umud
amur → umur

azag → uzag
aḍad → uḍad
amud → umud

azal → uzal
afuɣ → ufuɣ
adar → udar

- a— → we— :

alma → welma
agni → wegni

ajgu → wejgu
acbi → wecbi

axxam → wexxam
annar → wennar

awwur → wewwur

- ta— → t— :

tamurt → tmurt

tanuṭ → tnuṭ

takurt → tkurt

- ta— → te— :

tagnit → tegnit

tajgut → tejgut

taxxamt → texxamt

tawwurt → tewwurt

8/9

Talɣiwin n yisem amaruz
3. Tiɣri umagrad `i` ur tettbeddil ara

a. S ukeccum n wezgen-aɣri y :

Alugen :

Talɣa n yisem deg waddad ilelli	Talɣa n yisem deg waddad amaruz
`i`—	`yi`—
`ti`—	`ti`—

Alugen-agi ṭṭafaren-t yismawen yesɛan talɣa-yagi ((t)i d amagrad):
(t)iC₁(C₁)(V)(C₂)(t)

Amedya :

iḍ → yiḍ
icc → yicc
izem → yizem

iccer → yiccer
ikkil → yikkil
iṭij → yiṭij

tiṭ → tiṭ
tikkelt → tikkelt
tidderɣelt → tidderɣelt

tili → tili
tidet → tidet
timmi → timmi

b. War akeccum n wezgen-aɣri y, i yismawen yesɛan snat n tunṭiqin yeldin neɣ ugar, wid yesɛan talɣa :
iC₁VC₂(C₂)V(C₃)

Amedya :

izimer → izimer

igenni → igenni

imeddukal → imeddukal

igawawen → igawawen

Tamawt :

Tunṭiqt d aḥric deg wawal, melmi i d-neqqar awal, nessenṭaq-it-id d tunṭiqin.
Amedya: awal izimer yebḍa ɣef tlata n tunṭiqin: i + zi + mer

Tunṭiqt tezmer ad tili teldi neɣ tbelleɛ. Tunṭiqt yeldin d tin yettfakan s yiwet seg teɣra tigejdanin, tesɛa talɣa-yagi : C(C)a / C(C)u / C(C)i akka am : a, u, i, ma, lu, si, ddu, kka, zzi, ... Tunṭiqt ibellɛen d tin yettfakan dima s tergalt, tesɛa talɣa-yagi C(C)VC(C), akka am: war, ddar, ẓẓal, ...

Akken daɣen awal izimer yesɛa snat n tunṭiqin yeldin i, zi d yiwet n tunṭiqt ibellɛen mer.

9/9

Talɣiwin n yisem amaruz
3. Tiɣri umagrad `u` ur tettbeddil ara

Alugen :

Talɣa n yisem deg waddad ilelli	Talɣa n yisem deg waddad amaruz
`u`—	`wu`—
`tu`—	`tu`—

Alugen-agi ṭṭaferen-t yakk yismawen yesɛan tiɣri u deg umagrad-nsen, war tisuraf.

Amedya :

uccen → wuccen
ul → wul

uglan → wuglan
uẓu → wuẓu

tuga → tuga
tuɣmest → tuɣmest

tukkra → tukkra
tuglacin → tuglacin